𝗜𝗦𝗞𝗔𝗔𝗦𝗛𝗜𝗚𝗔 𝗔𝗪𝗤𝗔𝗔𝗙𝗧𝗔 𝗦𝗢𝗢𝗠𝗔𝗔𝗟𝗜𝗬𝗔 𝗜𝗬𝗢 𝗧𝗨𝗥𝗞𝗜GA 𝗢𝗢 𝗚𝗔𝗟𝗔𝗬 𝗪𝗘𝗝𝗜 𝗖𝗨𝗦𝗨𝗕.

Ankara, Turkey, Jimca, 07 Agoosto 2026

Wasiirka Awqaafta iyo Arrimaha Islaamka ee Xukuumadda Federaalka Soomaaliya, Mudane Sheekh Mukhtaar Roobow Cali, ayaa booqasho rasmi ah ku tagay Xarunta Hay’adda Awqaafta ee Jamhuuriyadda Turkiga, halkaas oo uu kulan miro dhal ah kula yeeshay Agaasimaha Guud ee hay’adda, Izzani Turan, iyo Agaasime Ku-xigeenka, Osman Zeki Cakiroglu.

Kulanka waxaa Wasiirka ku weheliyey Danjiraha Jamhuuriyadda Federaalka Soomaaliya u fadhiya Turkiga, Mudane Fathudiin Cali, iyo xubno ka tirsan wafdiga Wasaaradda. Intii uu socday kulanka, labada dhinac ayaa yeeshay wada-tashi ku saabsan sidii loo sii xoojin lahaa iskaashiga taariikhiga ah ee Soomaaliya iyo Turkiga ee dhinaca awqaafta, iyagoo si gaar ah diiradda u saaray horumarinta maamulka awqaafta, dhismaha hay’adaha, kobcinta awoodda shaqaalaha, iyo isdhaafsiga khibradaha farsamo.

Mas’uuliyiinta Hay’adda Awqaafta ee Turkiga ayaa soo bandhigay waayo-aragnimada ay dalkoodu u leeyahay maamulka iyo horumarinta awqaafta, iyagoo muujiyey diyaar garow ay Soomaaliya kula wadaagayaan aqoonta iyo khibradaha gacan ka geysan kara tayeynta hay’adaha awqaafta ee dalka.

Dhankiisa Wasiir Sheekh Mukhtaar, ayaa mas’uuliyiinta Hay’adda Awqaafta ee Turkiga la wadaagay mudnaanta weyn ee Dowladda Federaalka Soomaaliya ay siinayso horumarinta awqaafta, isagoo iftiimiyey dib-u-habeynta iyo nidaamyada cusub ee lagu casriyeynayo maamulka awqaafta, si ay door muuqda uga qaadato horumarinta adeegyada bulshada iyo kobcinta dhaqaalaha ku dhisan waqafka. Wasiirku wuxuu carrabka ku adkeeyey in dowladda ay ka go’an tahay dhismaha hannaan hufan oo waafaqsan sharciga iyo maamulka casriga ah, taas oo u baahan iskaashi iyo isdhaafsi khibradeed oo lala yeesho hay’adaha hormuudka ka ah arrimaha awqaafta.

Kulankan ayaa la filayaa inuu gogol xaaro marxalad cusub oo iskaashiga u dhexeeya Muqdisho iyo Ankara ee dhinaca awqaafta, iyadoo labada dhinac ay muujiyeen rabitaan iyo ka go’naan ku aaddan hirgelinta barnaamijyo wax ku ool ah oo lagu horumarinayo maamulka awqaafta, tayeynta hay’adaha, iyo kor u qaadista hufnaanta adeegyada la xiriira awqaafta ee Soomaaliya.